Friday, August 31

എന്തിന് നിലവിളക്ക് കൊളുത്തണം..?



    ഞാനൊരു മത പണ്ഡിതനല്ല. എന്നാലും ഞാനെഴുതുന്ന വിഷയം അവതരിപ്പിക്കാന്‍ ഇപ്പോഴുള്ള അറിവ് ധാരാളമാണ് എന്ന് തോന്നിയത് കൊണ്ടാണ് ഇതെഴുതുന്നത്. കാര്യങ്ങള്‍ വെട്ടിത്തുറന്ന് പറഞ്ഞു കഴിഞ്ഞാല്‍ ചിലപ്പോള്‍ ഞാനും ഒരു തീവ്രവാദിയായി മുദ്ര കുത്തപ്പെട്ടേക്കാം. ഞാനൊരു തീവ്രവാദിയോ ഭീകരവാദിയോ അല്ല എന്ന് മാത്രമല്ല, കേരളത്തിലെ ഒരു മതരാഷ്ട്രീയ സംഘടനയിലും മെമ്പര്‍ഷിപ്പ്‌ പോലും ഇല്ലാത്ത ഒരു വ്യക്തി കൂടിയാണ് എന്ന് കൂടി ഓര്‍മ്മിപ്പിക്കുന്നു.
നിലവിളക്ക് കൊളുത്താത്തതിന് വിദ്യാഭ്യാസമന്ത്രിയെയും മുസ്ലിം ലീഗ് എം എല്‍ എ മാരെയും കരിവാരിത്തേക്കാന്‍ ഒരു പ്രത്യേക മതവിഭാഗത്തിലെ ജനങ്ങള്‍ വലിയ ആവേശം കാണിക്കുന്നതായി  ശ്രദ്ധയില്‍പ്പെട്ടു. വിളക്ക് കൊളുത്താന്‍ താല്‍പര്യമില്ലാത്തവര്‍ കൊളുത്തണ്ട. താല്പര്യമുള്ളവര്‍ കൊളുത്തട്ടെ. ഇതിനെയല്ലേ സ്വാതന്ത്രം എന്ന് നമ്മള്‍ പേരിട്ടിരിക്കുന്നത്.

    എന്താണ് അമുസ്ലിം സുഹൃത്തുക്കളുടെ അസഹിഷ്ണുതയുടെ കാരണം എന്ന് മനസ്സിലാവുന്നില്ല. കേരളം ഒഴിച്ച് മറ്റു പല സംസ്ഥാനങ്ങളിലും ഉത്ഘാടനവും ഉത്സവവും തുടങ്ങി പാല് കാച്ചലും എണ്ണ കാച്ചലും വരെ എന്തും പൂജയും വിഗ്രഹാരാധനയും കൊണ്ടാണ് തുടങ്ങുക. കേരളത്തില്‍ പല സിനിമാക്കാരും പൂജ ചെയ്തിട്ടാണ് തുടങ്ങുന്നത്. ഇതെല്ലാം കണ്ട് വളരുന്ന മേല്‍പ്പറഞ്ഞ കൂട്ടര്‍ക്ക് ഇത് ഒരു സംസ്കാരമാണെന്ന് വിശ്വസിക്കാന്‍ കഴിയുന്നില്ല എന്നതാണ് വാസ്തവം.

ഈ ആധുനിക യുഗത്തില്‍ സര്‍ക്കാര്‍ കാര്യങ്ങളില്‍ എന്തിനിത്ര കടുംപിടുത്തം? നിലവിളക്ക് കൊളുത്തിയില്ലെങ്കില്‍ സ്മാര്‍ട്ട്സിറ്റി പദ്ധതി പൂര്‍ത്തിയാവില്ലേ? എയര്‍പോര്‍ട്ട് പൊങ്ങില്ലേ? എല്ലാ ഉദ്ഘാടനവും നിലവിളക്ക് കൊളുത്തി ത്തന്നെ നടത്തുന്നതിലെ യുക്തി മനസ്സിലാവുന്നില്ല. പണ്ട് അട്ടപ്പാടിയില്‍ ഹൗസിംഗ് കോളനി രാഷ്‌ട്രപതി എ പി ജെ അബുല്‍കലാം ഉദ്ഘാടനം ചെയ്തത് തിരശ്ശീല അനാവരണം ചെയ്തായിരുന്നു. റിമോട്ട് കണ്ട്രോള്‍ ബട്ടണ്‍ അമര്‍ത്തിയപ്പോള്‍ ആ തിരശ്ശീല നീങ്ങി സര്‍ക്കാര്‍ പണിത വീടുകള്‍ ദൃശ്യമായി. ഇത്തരം നൂതന ആശയങ്ങള്‍ അതത്‌ മേഖലകളിലെ ഉദ്ഘാടനവേളയില്‍ അവതരിപ്പിക്കണം.

പാല് കാച്ചാനും, കമ്പ്യൂട്ടര്‍ സെന്‍റെര്‍ തുടങ്ങാനും,  യുവജനോത്സവ പരിപാടിക്കും മറ്റെല്ലാ അല്‍ക്കുല്‍ത്ത് പരിപാടികള്‍ക്കും നിലവിളക്ക് കൊളുത്തിത്തന്നെ ഉദ്ഘാടനം നിര്‍വഹിക്കണമെന്ന ഭ്രാന്തന്‍ ചിന്താഗതി ആരുടെയാണ്?  നമ്മുടെ രാജ്യത്തിന്‍റെ വികസന കാര്യങ്ങളില്‍ ദയവുചെയ്ത് ആരുടെയും മതാചാരങ്ങള്‍ കൊണ്ടുവരാതിരിക്കുക. രാജ്യം മതേതരത്വത്തോടെ നിലനില്‍ക്കുന്നിടത്തോളം ഇങ്ങനെയൊരു സന്മനസ്സ് കാണിക്കാന്‍ എല്ലാ മതവിഭാഗങ്ങളും തയാറാവണം. കേരളത്തിന്‍റെ സംസ്കാരമാണ് നിലവിളക്ക് കൊളുത്തല്‍ എന്ന് പറഞ്ഞ് മന്ത്രിക്കും മുസ്ലിം ലീഗ് എം എല്‍ എ മാര്‍ക്കും നേരെ കുതിര കയറുന്നവര്‍ ചിന്തിക്കേണ്ടത് ഈ സംസ്കാരം എങ്ങനെ ഇസ്ലാമിക വിരുദ്ധമായി എന്നതാണ്.

അല്ലെങ്കില്‍ ഈ സംസ്കാരം ചിലര്‍ക്ക്‌ നിരക്കുന്നതല്ല എങ്കില്‍ അത് വേണ്ടെന്ന് വെക്കാന്‍ എന്ത് കൊണ്ട് ഈ വിശാല ഹൃദയ കേരള സംസ്കാര സ്നേഹികള്‍ തയാറാവുന്നില്ല.

ഇനി മുസ്ലിംകള്‍ അത് ഒഴിവാക്കാന്‍ ഉള്ള കാരണം പറയാം. എന്‍റെ അറിവില്‍ അത് ശിര്‍ക്ക്‌ അഥവാ ബഹുദൈവാരാധന എന്ന നിലക്കാണ്. അഗ്നി ഒരു ആരാധനാ വസ്തുവാണ്. അഗ്നിയെ തെളിക്കുന്നത് അതിനെ ആരാധിക്കുക എന്ന ചിന്തയോടെയാണ്. നിറഞ്ഞ വെളിച്ചം ഉള്ള പകല്‍ നിറയെ ട്യൂബ് ലൈറ്റുകളുടെ നടുവില്‍ ഒരു വിളക്ക് കൊളുത്തുന്നത് എന്തിനാണ് എന്നതാണ് ഇവിടെ ചോദ്യം?. ഇനി ഈ 'ശിര്‍ക്ക്‌' എന്താണെന്ന് കൂടി പറയാം. അല്ലാഹുവല്ലാത്ത മറ്റൊരു വസ്തുവിനെ ആരാധിക്കുന്നതിനെയാണ് ശിര്‍ക്ക്‌ എന്ന് പറയുന്നത്. ബഹുദൈവാരാധന ഇസ്ലാമിലെ ഏറ്റവും വലിയ പാപമാണ് (The Great sin). എല്ലാ തെറ്റുകളും അള്ളാഹു പൊറുക്കുന്നതാണ്, ശിര്‍ക്കൊഴികെ എന്നാണ് ഇസ്ലാമിക പാഠം. ഒരല്‍പം മതബോധമുള്ള മുസ്ലിംകള്‍ വെറുതെയാണോ നിലവിളക്ക് കൊളുത്താന്‍ തയാറാവാത്തത്!.ഇത് തന്നെയാണ് കാരണം. ഏറ്റവും വലിയ തെറ്റ് സംഭവിച്ചു പോവുമോ എന്നാണ് അവര്‍ ഭയക്കുന്നത്. അതല്ലാതെ ഒരു മത വിഭാഗത്തോടും എതിര്‍പ്പുണ്ടായിട്ടോ വെറുപ്പുണ്ടായിട്ടോ അല്ല.

കൊല്ലങ്ങള്‍ക്ക്മുമ്പ്‌, ഉത്തര്‍പ്രദേശില്‍ ബിജെപി സര്‍ക്കാര്‍ എല്ലാ സ്കൂളുകളിലും വന്ദേ മാതരം ആലപിക്കണമെന്ന നിയമം കൊണ്ടുവന്നു. ഇത് കാരണമായി മുസ്ലിം കുട്ടികള്‍ ആകെ കുഴപ്പത്തിലായി. അന്നത്തെ ഇമാം നദുവി അവര്‍കള്‍ കുട്ടികളെ സ്കൂളുകളിലേക്ക് പറഞ്ഞയക്കരുത് എന്ന ആഹ്വാനവുമായി രംഗത്ത് വന്നു. അദ്ദേഹത്തിനും അവിടുത്തെ മുസ്ലിംകള്‍ക്കും അതല്ലാതെ വേറെ നിവൃത്തിയില്ലായിരുന്നു. വന്ദേ മാതരം ആലപിക്കുന്നത് ബഹുദൈവാരാധനയാകുമോ എന്നത് തന്നെയാണ് ഇവിടെയും പ്രശ്നമായത്.

അതെ സമയം നാട മുറിച്ച് ഉദ്ഘാടനം ചെയ്യപ്പെടുന്ന ഒരു സമ്പ്രദായവും നമ്മുടെ നാട്ടിലുണ്ട്. ഇത് ഇസ്ലാമിക രീതിയേയല്ല. എന്നിട്ടും ശിഹാബ്‌തങ്ങളോ മറ്റ് തങ്ങള്‍മാരോ ഇതിനെ എതിര്‍ത്ത് കണ്ടില്ല. അവര്‍ ആ രീതിയില്‍ തന്നെ എത്രയോ ഉദ്ഘാടനങ്ങള്‍ നിര്‍വഹിക്കുകയും ഇപ്പോഴും നിര്‍വഹിച്ചു കൊണ്ടിരിക്കുകയും ചെയ്യുന്നു. നിലവിളക്ക് കൊളുത്താന്‍ തയാറല്ലാത്ത ഒരു മുസ്ലിം വ്യക്തി ഉദ്ഘാടനത്തിന് വരുമ്പോള്‍ രണ്ടു കൂട്ടര്‍ക്കും സ്വീകാര്യമായ രീതിയില്‍ ഉദ്ഘാടനം ഏര്‍പ്പാടാക്കുന്നതല്ലേ അതിന്‍റെ മാന്യത.

പുത്തന്‍പള്ളിയിലും കൊടുങ്ങല്ലൂരിലുമുള്ള പള്ളികളിലെ നിലവിളക്കുകളെ കുറിച്ച് പലരും ചോദ്യം ഉന്നയിക്കുന്നത് കേട്ടു. ആ വിളക്കുകള്‍ വെറുതെ എണ്ണ ഒഴിച്ച് വെക്കുക മാത്രമാണ് ചെയ്യുന്നത്. പണ്ട് കാലത്ത് വെളിച്ചം കിട്ടാന്‍ കത്തിച്ചിരുന്നു എന്ന് പറയപ്പെടുന്നു. അതല്ലാതെ, ആ നിലവിളക്കുകളും ഇസ്ലാമിക ആരാധനകളും തമ്മില്‍ യാതൊരു ബന്ധവുമില്ല.

സ്വന്തം മതവും വിശ്വാസവും മറ്റുള്ളവര്‍ കൂടി അവലംബിച്ചു കാണണമെന്ന മോഹം നമ്മില്‍ നിന്നും എന്ന് നീങ്ങിപ്പോകുന്നുവോ അന്ന് ഇത്തരം സംഭവങ്ങള്‍ വാര്‍ത്തകളെ ആവില്ല. മതങ്ങളെയും സംസ്കാരങ്ങളെയും മുന്‍നിര്‍ത്തി മത്സരിക്കുന്ന ഒരു ജനതയായി നാം മാറരുത്. മറിച്ച്, മതവും സംസ്കാരവും തങ്ങളില്‍ തന്നെ നിലനിര്‍ത്തി മറ്റുള്ളവരുടെ താല്‍പ്പര്യങ്ങളെ ഹനിക്കാതെ നാടിന്‍റെ നന്മക്കായ് പ്രവര്‍ത്തിക്കുന്ന ഒരു ജനതയാവണം. അതല്ലാത്തിടത്തോളം മനുഷ്യദൈവങ്ങളും കപട രാഷ്ട്രീയക്കാരും നാമെന്ന പൊതുജനത്തെ തമ്മിലടിപ്പിച്ച് സ്വന്തം ആസ്തിയും ആമാശയവും വീര്‍പ്പിച്ചു കൊണ്ടിരിക്കും.

Friday, August 17

തണലായി തണല്‍...


    ഒരു കൊച്ചു ഗ്രാമത്തില്‍ ഒരു ചെറിയ ചാരിറ്റബിള്‍ ട്രസ്റ്റ്‌. ആ ട്രസ്റ്റ്‌ ഭാരവാഹികള്‍ ചുറ്റുപാടുമുള്ള ജീവകാരുണ്യ പ്രവര്‍ത്തനങ്ങളില്‍ സജീവമായി പങ്കെടുക്കുന്നു. സ്വന്തം ബാനറില്‍ ജീവ കാരുണ്യ പ്രവര്‍ത്തനങ്ങള്‍ നടത്തി വരുന്നു. പാലക്കാട്‌ ജില്ലയിലെ തൃത്താല-കക്കാട്ടിരി മേഖലയില്‍ രൂപം കൊണ്ട 'തണല്‍' എന്ന സംഘടന എല്ലാവര്‍ക്കും മാതൃകയാണ്. ചാരിറ്റബിള്‍ ഓര്‍ഗനൈസേഷന്‍സ് നമ്മുടെ നാട്ടില്‍ ഒട്ടും പുതുമയുള്ള കാര്യമല്ല. പേരുകേട്ട ബിസിനസ് മുതലാളിമാര്‍ മുതല്‍ സാധാരണ തൊഴിലാളികള്‍ വരെ അംഗങ്ങളായുള്ള ധാരാളം ട്രസ്റ്റുകളും സൊസൈറ്റികളും നമുക്ക്‌ ചുറ്റിലുമുണ്ട്.

ഇവരില്‍ നിന്നെല്ലാം തണല്‍ വേറിട്ട്‌ നില്‍ക്കുന്നത്‌ എങ്ങനെയെന്നാല്‍ ഈ സംഘടനയുടെ പ്രവര്‍ത്തകര്‍ ഇവരുടെ ധനം മാത്രമല്ല സമയവും സമൂഹത്തിന് വേണ്ടി ചിലവഴിക്കുന്നു എന്നത് കൊണ്ടാണ്. ഇതിന്‍റെ ചെയര്‍മാനും കണ്‍വീനറും അടക്കം പലരും ഇതിന്‍റെ പ്രവര്‍ത്തങ്ങളില്‍ സജീവമാണ്. ഇവരാരും ജീവിതത്തില്‍ തിരക്കില്ലാത്തവര്‍ ആയതു കൊണ്ടല്ല. ചെയര്‍മാനും കണ്‍വീനറും തൃത്താല മണ്ഡലത്തിലെ പ്രമുഖ ജ്വല്ലറി വ്യാപാരികളാണ്.

കൈരളിയുടെ പ്രവാസലോകം പരിപാടിയില്‍ സ്വന്തം മകനെക്കുറിച്ച് അവതരിപ്പിക്കാന്‍ സ്ഥലത്തെ മുസ്ലിം ലീഗ് രാഷ്ട്രീയ നേതാവു കൂടിയായ നൗഷാദ് സാഹിബിനെ പടിഞ്ഞാറങ്ങാടിയിലെ ഒരു വൃദ്ധനായ പിതാവ് തേടിവന്നതു മുതലാണ്‌ തണല്‍ എന്ന ഒരു ചാരിറ്റി ട്രസ്റ്റിന്‍റെ അവശ്യകതയെ കുറിച്ച് ഇവര്‍ ചിന്തിച്ചത്‌. ഈ വൃദ്ധനെ സഹായിക്കാനായി നൗഷാദ് സാഹിബ്‌ തന്നെ തിരുവനന്തപുരത്തെ കൈരളി സ്റ്റുഡിയോ വരെ ഈ വൃദ്ധനോടൊപ്പം പോവാന്‍ തയാറായി. പണം കൊണ്ട് സഹായിച്ച് കായിക പ്രവര്‍ത്തനങ്ങള്‍ മറ്റുള്ളവര്‍ ചെയ്യട്ടെ എന്ന് ചിന്തിക്കുന്ന മുതലാളി പ്രമാണിമാര്‍ക്ക് മാതൃകയാണ് നൗഷാദ് സാഹിബും കണ്‍വീനര്‍ ഇബ്രാഹിം സാഹിബും.

തണല്‍ രൂപം കൊണ്ട് ഏതാനും മാസങ്ങളെ ആയിട്ടുള്ളൂവെങ്കിലും ഈ കുറഞ്ഞ സമയത്തിനുള്ളില്‍ പല ഉദ്യമങ്ങളും ഏറ്റെടുത്ത് വിജയിപ്പിക്കാന്‍ തണലിന് കഴിഞ്ഞു എന്നത് ശ്ലാഘനീയമാണ്.



തണല്‍ ഇതുവരെ ഏറ്റെടുത്ത് വിജയിപ്പിച്ച പ്രധാന പ്രവര്‍ത്തനങ്ങള്‍...

1)  എട്ടു വര്‍ഷമായി നാട് വിട്ട് പോയി കുടുംബവുമായി യാതൊരു ബന്ധവുമില്ലാതെ കഴിഞ്ഞിരുന്ന റാസിഖ് എന്ന ചെറുപ്പക്കാരനെക്കുറിച്ച് കൈരളി ചാനലിലെ പ്രവാസലോകം പരിപാടിയില്‍ അവതരിപ്പിക്കുകയും പ്രസ്തുത വ്യക്തി ഏതാനും ദിവസങ്ങള്‍ക്കുള്ളില്‍ തണല്‍ ചെയര്‍മാനെ തേടിയെത്തുകയും ചെയ്തു.

2)  കുമരനെല്ലൂരില്‍ തീര്‍ത്തും അവശനായി ഉറുമ്പരിച്ചു കിടന്നിരുന്ന കരീം എന്ന വ്യക്തിയെ ഏറ്റെടുക്കുകയും ഇപ്പോള്‍ തണലിന്‍റെ പൂര്‍ണ്ണ ഉത്തരവാദിത്വത്തിലും ചിലവിലും ആശുപത്രിയില്‍ ചികില്‍സയും ശുശ്രൂഷയും നല്‍കിക്കൊണ്ടിരിക്കുന്നു.

3)  പഠനത്തില്‍ മുന്നില്‍ നില്‍ക്കുന്ന നിര്‍ദ്ധനരായ വിദ്യാര്‍ത്ഥികള്‍ക്ക്‌ സാമ്പത്തിക സഹായവും മറ്റു പഠന സാമഗ്രികളും നല്‍കി. 

4)  നേത്ര ചികിത്സാ ക്യാമ്പ്‌ സംഘടിപ്പിച്ചു.

5)  തൃത്താല വട്ടത്താണി മുതല്‍ കക്കാട്ടിരി മല റോഡു വരെ റോഡിനിരുവശവും അഞ്ഞൂറോളം വൃക്ഷത്തൈകള്‍ നട്ടുപിടിപ്പിച്ചു.

ലക്ഷ്യങ്ങള്‍:

സൗജന്യ ചികിത്സാ ക്യാമ്പുകള്‍...

നിര്‍ദ്ധനരായ വിദ്യാര്‍ഥികളെ ദത്തെടുത്ത് വളര്‍ത്താനുള്ള പദ്ധതികള്‍..

സമ്പൂര്‍ണ്ണ സാക്ഷരതാ യജ്ഞം..

കരീംക്കയെ പോലെ സമൂഹത്തില്‍ അവഗണിക്കപ്പെട്ട വ്യക്തികളെ കണ്ടെത്തി സംരക്ഷിക്കുക.

സാന്ദര്‍ഭികമായി ഉരുത്തിരിയുന്ന മറ്റു സാമൂഹിക പ്രവര്‍ത്തനങ്ങള്‍

തണലിന്‍റെ ചാരിറ്റി പ്രവര്‍ത്തനങ്ങളില്‍ നിന്നും പകര്‍ത്തിയ ചില ദൃശ്യങ്ങള്‍ ഇവിടെ കൊടുക്കുന്നു..
തണല്‍ എന്ന സംഘടന മറ്റു മേഖലകളിലേക്കും വ്യാപിപ്പിക്കാന്‍ ഇവര്‍ക്ക്‌ താല്‍പര്യമുണ്ട്‌. തണലിന്‍റെ പ്രവര്‍ത്തനങ്ങളില്‍ സഹകരിക്കാന്‍ നിങ്ങള്‍ക്ക്‌ താല്പര്യമുണ്ടെങ്കില്‍ അതുമല്ലെങ്കില്‍ നിങ്ങളുടെ പ്രവര്‍ത്തനങ്ങളില്‍ തണലിന്‍റെ സഹകരണം ആവശ്യമുണ്ടെന്ന് തോന്നിയാല്‍ താഴെ കാണുന്ന നമ്പറുകളില്‍ വിളിക്കുക.
Mr.Noushad-9048888881,Mr.Ibrahim-9947467772,Mr.Mansoor-9846167836
പ്രിയപ്പെട്ടവരേ.. തണല്‍ പ്രവര്‍ത്തകരെ അകമഴിഞ്ഞ് സഹായിക്കുക, പ്രോത്സാഹിപ്പിക്കുക. കഴിയുമെങ്കില്‍ ഈ അറിയിപ്പ്‌ ഒന്ന് ഷെയര്‍ ചെയ്യുക. മറ്റുള്ളവര്‍ക്ക് ഇവര്‍ പ്രോത്സാഹനം ആവട്ടെ. ഒന്ന് ചിന്തിച്ചു നോക്കൂ. ഓരോ ഗ്രാമത്തിലും ഇത് പോലെ ഓരോ സംഘടനകള്‍ ഉണ്ടായിരുന്നുവെങ്കില്‍ സമൂഹത്തിന് എത്ര ഗുണകരമാവുമായിരുന്നു.

Monday, August 6

കുവൈറ്റ്‌ മോഡേണ്‍ ആര്‍ട്ട്‌ ഗാലറി..

കുവൈറ്റ്‌ സൂക് ശര്‍ഖിന് എതിര്‍വശത്താണ് കുവൈറ്റ്‌ മോഡേണ്‍ ആര്‍ട്ട്‌ മ്യുസിയം.

മ്യുസിയത്തിലേക്കുള്ള പ്രവേശനം തികച്ചും സൗജന്യമാണ്. അറബ് കലാകാരമ്മാരുടെയും വിദേശ കലാകാരമ്മാരുടെയും പെയിന്റിംഗ്കളുടെയും കരകൌശല വസ്തുക്കളുടെയും നല്ല ഒരു ശേഖരം തന്നെ ആര്‍ട്ട്‌ മ്യുസിയത്തില്‍ ഉണ്ട്.

മോഡേണ്‍ ആര്‍ട്ട്‌ എന്ന പേരില്‍ മരത്തില്‍ തീര്‍ത്ത ഒരു പാട് രൂപങ്ങള്‍ മ്യുസിയത്തില്‍ ഉണ്ടെങ്കിലും അത് കാണുന്നവര്‍ ചിന്തിക്കുക എന്തിനാണ് അങ്ങനെ കുറെ രൂപങ്ങള്‍ ഉണ്ടാക്കി വെച്ചിരിക്കുന്നത് എന്നാണ്. കാരണം ആ വസ്തുക്കള്‍ നമുക്ക് യാതൊരു അനുഭൂതിയും നല്‍കുന്നില്ല.അത് കൊണ്ട് തന്നെ അവയുടെ ഫോട്ടോ എടുക്കാന്‍ മിനക്കെട്ടുമില്ല.

ഇവിടെ ചേര്‍ത്ത സുന്ദരമായ വര്‍ക്കുകള്‍ മ്യുസിയത്തിന്റെ ചുമരില്‍ ഭംഗിയായി പ്രദര്‍ശിപ്പിച്ചിട്ടുള്ളവയാണ്..

വിശാലമായ വലിയ ഒരു കെട്ടിടത്തില്‍ രണ്ടു നിലകളില്‍ പത്തോളം വിശാലമായ ഹാളുകളില്‍ ആയിട്ടാണ് പ്രദര്‍ശനം.

ഒരു സന്ധ്യാ നേരത്താണ് ഞാന്‍ മ്യുസിയത്തില്‍ എത്തിപ്പെട്ടത്. മ്യുസിയത്തിന്റെ നടുമുറ്റത്തേക്ക് ചാഞ്ഞു വീഴുന്ന വെയിലും നിശബ്ദമായ അന്തരീക്ഷവും ആളൊഴിഞ്ഞ വരാന്തകളും കേരളത്തിലെ ഏതോ നാലുകെട്ടില്‍ എത്തപ്പെട്ട പ്രതീതി ഉളവാക്കി.

വെള്ളി ഞായര്‍ ഒഴികെ എല്ലാ ദിവസവും രാവിലെ 8.30 മുതല്‍ 1.൦൦ pm വരെയും വൈകിട്ട് 4.30 മുതല്‍ 8.00 pm വരെയും ആണ് സന്ദര്‍ശന സമയം.